گرمی میں کھانے کی بہترین غذا*

*گرمی میں کھانے کی بہترین غذا*

جب درجہ حرارت بڑھتا ہے اور گرمی کی شدت میں اضافہ ہوتا ہے تو جسم میں پانی کی کمی کا مسئلہ درپیش آتا ہے۔

ماہرین صحت متعدد غذاؤں کو گرمی میں جسم میں پانی کی ضروریات پوری کرنے کے لیے استعمال کرنے کا مشورہ دیتے ہیں جن میں سے چند درج ذیل ہیں۔

*سلاد پتہ*

اس سبزی میں 90 فیصد تک پانی موجود ہوتا ہے۔ یہ سبزی انسانی جسم کے لیے بہت فائدہ مند ہوتی ہے۔ پروٹین سے بھرپور اس سبزی میں کیلوریز کی مقدار بہت کم ہوتی ہے جبکہ اومیگا تھری، آئرن اور صحت کے لیے فائدہ مند فائبر بھی اس کو اہم بناتے ہیں۔ سلاد پتہ کھانے سے السر کی بیماری سے چھٹکارہ حاصل کیا جاسکتا ہے۔ یہ ایک ایسی سبزی ہے جو اپنے اندر بے شمار فوائد رکھتی ہے۔

*گوبھی*

اس سبزی میں 89 فیصد پانی شامل ہوتا ہے۔ اس کی سب سے بڑی خصوصیت یہ ہے کہ یہ موسم گرما میں الرجی کے خلاف بہترین غذا مانی جاتی ہے۔ گوبھی میں چکنائی کی مقدار بہت کم ہوتی ہے جبکہ فائبر کی اچھی خاصی تعداد پائی جاتی ہے۔ گوبھی سلفر سے بھرپور ہوتی ہے جو چکنی جلد کو خشک رکھنے میں مدد دیتی ہے۔

*سیب*

اس پھل میں 86 فیصد پانی موجود ہوتا ہے اس کے ساتھ ساتھ اس میں فائبر اور وٹامن سی بھی شامل ہے اور یہ گرمی میں پانی کی کمی کو روکنے کا بہترین ذریعہ ہے۔ سیب دل کو طاقت دیتا ہے اس کے علاوہ اس میں فاسفورس پایا جاتا ہے جو انسانی صحت کے لیے مفید اور ضروری ہیں۔ سیب جگر کی اصلاح کرتا ہے اور اسے طاقت بھی دیتا ہے۔

*دہی*

دہی گرمی کے موسم میں پانی کی کمی کو روکنے کا بہترین ذریعہ ہے۔ اس میں 85 فیصد پانی موجود ہے۔ اس میں بے شمار وٹامن اور کیلشیم موجود ہیں اور یہ گرمی میں مختلف الرجی کے خلاف بہت اچھی غذا ہے۔ دہی کی لسی بناکر پینے سےمعدے کی تیزابیت دور ہوتی ہے اور دہی السر کے مریضوں کے لیے نہایت مفید ہے۔ دہی سے بہتر غالباً کوئی دوسری غذا نہیں ہوتی۔

*چاول*

پکے یا ابلے ہوئے چاولوں میں 70 فیصد پانی موجود ہوتا ہے جس کی وجہ سے یہ موسم گرما میں پانی کی کمی ہونے سے روکتے ہیں اور انسانی جسم کے لیے فائدہ مند ثابت ہوتا ہے۔

*تربوز*

گرمیوں کے موسم میں تربوز کا استعمال کرنے سے ہمیں صحت پر معجزاتی نتائج مل سکتے ہیں، تربوز میں 90 فیصد پانی موجود ہوتا ہے جس کی وجہ سے موسم گرما میں ہمیں پانی کی کمی کی شکایت نہیں ہوتی جب کہ اس میں بے حد کم مقدار میں کیلوریز پائی جاتی ہیں جس سے آپ کو موٹاپے کے خطرات بھی لاحق نہیں ہوتے۔

*کھیرا*

کھیرا جسم کو تروتازہ رکھنے کے لیے ایک بہترین غذا سمجھی جاتی ہے، کھیرے میں بھی 90 فیصد سے زائد پانی موجود ہوتا ہے جب کہ اس میں وٹامن بی 1، بی 2، بی 3، بی 5 اور بی 6 وافر مقدار میں پایا جاتا ہے۔

گرمیوں میں روزانہ کھیرے کا استعمال کرنے سے آپ کے جسم میں پانی کی کمی نہیں ہوگی۔

*٭تلسی کے بیج٭*

تلسی کے بیجوں کو موسم گرما میں استعمال کرنے سے یہ جسم کو ٹھنڈک پہنچانے کا کام کرتے ہیں جب کہ تلسی کے بیجوں میں فائبر، نمکیات اور اینٹی آکسیڈینٹس وافر مقدار میں پائے جاتے ہیں۔